PROXECTO NATURÉZATE 2023/24 (ECONOMÍA): SOCIOECONOMÍA E SECTOR MARISQUEIRO NO ESPAZO NATURAL

 

O departamento de Economía do IES Francisco Asorey, dentro da súa participación do Proxecto Naturézate dirixiu o estudo dos aspectos socioeconómicos das zonas marisqueiras do Espazo Natural cos alumnos de 4º ESO. Realizaron unha saída á “Praia do Serrido” e ó Punto de Control de pesado e venta do marisco recollido diariamente polas preto de 400 mariscadoras da asociación de Cambados.

A actividade foi guiada pola asociación de "Mulleres do Mar”, GUIMATUR. Así pois, a actividade comezou cunha visita ó barrio mariñeiro de San Tomé para comprender a relación entre urbanismo e tradición, visita que foi seguida por un itinerario guiado para coñecer os métodos de extracción de moluscos (ameixa, berberecho) e poliquetos, os utensilios utilizados e as principais especies explotadas e, xa no eido do propio sistema de extracción,  da necesidade de respectar as tallas mínimas legais para a preservación dos recursos.

Preto de 80 alumnos que, si ben manteñen nalgúns casos intensos vencellos co mar, maioritariamente comeza a observarse que, pese á proximidade do medio, existe gran descoñecemento no día a día no mundo do mar, inicio dunha separación sociolóxica polo descoñecemento por parte das xeracións máis xoves sobre este sector historicamente tan ligado ca sociedade do pobo.

PROXECTO NATURÉZATE 2023/24 (MATEMÁTICAS): APLICACIÓNS DO TEOREMA DE PITÁGORAS EN CAMBADOS

O famoso matemático grego Pitágoras, que viviu antes de Cristo, contribuíu de forma notable ao avance da xeometría, ofrecéndonos o seu famoso TEOREMA DE PITÁGORAS con multitude de aplicacións. Cos/as nosos/as alumnos/as podemos poñelo en práctica na nosa vida cotiá e concretamente nesta actividade que desenrolamos con eles nos arredores de Cambados. 

Co alumnado de 2º da ESO percorremos Cambados apreciando a paisaxe e desfrutando da natureza desta fermosa zona. 

Conforme avanzamos no camiño xúrdenos diferentes preguntas e dúbidas que gracias ás matemáticas, e concretamente ao TEOREMA DE PITÁGORAS, poderemos solucionar.

PROXECTO RÍOS 2023/24: OS RÍOS GALEGOS DESDE A LINGUA GALEGA

Galicia é a terra dos mil ríos, equilibrio e sustento do noso caudal,da nosa identidade.

Nós quixemos facer unha aportación a este patrimonio natural empregando outro valor que nos identifica como cultura, como pobo: a nosa lingua, a lingua galega. Inventamos xogos, percorremos cauces, descubrimos lendas... para facer visible o noso amor pola natureza e lembrar a necesidade de preservala.

Os nosos mil ríos deben seguir o seu curso para que continuemos existindo nós e as xeracións vindeiras, para que poidamos expresarnos e amosarnos tal como somos, coa nosa cultura, coa nosa lingua, coa nosa identidade.