PROXECTO RÍOS 2023/24: CONTROL DE PRIMAVERA NO RÍO PEQUENO

O pasado 17 de abril de 2014 volvemos os departamentos didácticos de Bioloxía e Xeoloxía e Física e Química do IES Francisco Asorey para realizar a segunda saída do control do Río Pequeno (afluente do Río Umia) dentro da programación prevista do Proxecto Ríos co alumnado de 4º ESO.

O profesor de Física e Química guiou ó alumnado no estudio dos diversos parámetros físicos (profundidade, caudal, temperatura, velocidade da corrente...) e químicos (concentración de nitratos, demanda de osíxeno, pH ...), mentres que os de Bioloxía foron os encargados de coordinar a recolección e identificación das especies de macroinvertebrados.

Nesta ocasión a situación é bastante diferente á que analizabamos no outono xa que despois de moitos meses de intensa chuvia evidenciase que o caudal é maior e temos que utilizar as botas de vadeo para realizar a recollida de mostras. Nesta ocasión a avaliación ecolóxica realizada danos un estado excelente da calidade das augas do Río Pequeno que pensamos é debido ao gran caudal durante todo o outono e inverno pasados.

PROXECTO NATURÉZATE 2023/24: CHARLA DIVULGATIVA "A IMPORTANCIA DA CONSERVACIÓN DO HUMIDAIS"

Os humidais son uns dos ecosistemas máis peculiares do noso planeta, acaso polo seu carácter de transición entre medio aéreo, terrestre e acuático, o que lle confire unha gran biodiversidade nun mínimo espazo.

Gran parte do litoral de Cambados e dos concellos limítrofes ou próximos rodean unha destas áreas, o Complexo intermareal do Umia - O Grove, que reúne unha serie de características que o converten nun espazo natural de gran importancia, feito que, desgraciadamente, descoñece gran parte da poboación que reside na súa contorna.

Por iso é importante a contribución de programas como o Proxecto NATÚREZATE na toma de conciencia e a posta en valor destas áreas, xunto con outras que albergan outros ecosistemas fundamentais na conservación da biodiversidade a nivel mundial.

Con este obxectivo, o 17 de abril veu ao noso centro un divulgador e educador ambiental con longa experiencia neste campo, o cambadés Manuel Núñeza a través dunha charla a alumado da ESO, na que, alén dos humidais, incidiu na importancia da conservación da biodiversidade incluso dende un punto de vista egoísta da humanidade, xa que está é a que nos proporciona alimento, cura de enfermidades o nos proporciona unhas condicións de habitabilidade para a nosa especie. Deste xeito describiu a lexislación a diferentes niveis (local, autonómico, estatal e internacional) que rexen sobre estas áreas protexidas, con especial énfase nos humidais.

PROXECTO RÍOS 2023/24 (XEOGRAFÍA E HISTORIA): OS RÍOS NOS OBXECTIVOS DO DESENVOLVEMENTO SUSTENTABLE

 

Na materia de Xeografía e Historia, o alumnado de 1º da ESO achegouse ao estudo da hidrosfera e dos ríos a través dos Obxectivos de Desenvolvemento Sustentable (ODS).

Despois de coñecer a definición e características, o alumnado dedicouse a asociar a influencia dos ríos no medio e nos poboamentos humanos a partir dos ODS. Para isto, foron analizando as distintas características e ligándoas aos distintos obxectivos: fin da pobreza, enerxías renovables, auga potable, vida submariña, etc.

Feito este traballo, o resultado foi a elaboración de xogos de mesa sobre os ODS e os ríos. Estes realizáronse de xeito grupal e foron intercambiados entre o alumnado para afondar e consolidar os contidos.

A continuación podemos ver fotografías cos resultados dos proxectos feitos polos alumnos:

 

PROXECTO NATURÉZATE (FÍSICA E QUÍMICA): A COR VERDE DOS VEXETAIS

 

Durante a celebración da Semana da Ciencia 23-24, no pasado mes de novembro, o departamento de física e Química, participante no Proxecta “Naturézate” realizou unha serie de actividades sobre diferentes técnicas de separación e identificación dos principais pigmentos fotosintéticos como elementos imprescindibles nos grupos de vexetais e de algas que forman os produtores dos diferentes ecosistemas e, polo tanto, son os elementos imprescindibles para garantir a biodiversidade nos espazos naturais.

Para a identificación e obtención das diferentes moléculas de pigmento, o alumnado de secundaria participante realizou unha serie de actividades prácticas sobre a solubilidade das clorofilas e xantofilas, utilizando diferentes exemplares vexetais habituais no Espazo Natural Umia-O Grove, ós que se mesturou con carbonato cálcico, ácido cítrico, etanol e gasolina coa finalidade de conseguir a súa separación.

PROXECTO NATURÉZATE 2023/24 (BIOLOXÍA E XEOLOXÍA): OS CINCO REINOS A TRAVÉS DO MICROSCOPIO

Durante a celebración da Semana da Ciencia 2023 entre os días 13 e 17 de novembro, que ao igual que no curso pasado estivo dedicado a importancia da ciencia básica no desenvolvemento sostible, dende o departamento de Bioloxía e Xeoloxía quixemos facer unha proposta de achegamento á biodiversidade con un punto de vista inhabitual cando se aborda este tema, o microscopio. 

Deste xeito elaboramos unha serie de preparacións microscópicas con mostras de organismos procedentes de cada un dos cinco reinos acompañados de esquemas descritivos coas características de cada un destes grupos e da relación existente entre eles a través do proceso evolutivo.

Así, o alumnado da ESO puido visualizar mostras de bacterias lácticas obtidas a partir dun iogur, protozoos e algas microscópicas, micelios de mofos procedentes de froita e pan en descomposición, esporas de fentos, epiderme de follas e algún pequeno insecto, como unha mínima representación da inmensurable biodiversidade do noso planeta.

PROXECTO RÍOS 2023/24: OUTONO NO RÍO PEQUENO

O pasado 25 de outubro de 2023, os departamentos didácticos de Bioloxía e Física e Química do IES Francisco Asorey realizaron a primeira saída de control do Río Pequeno (afluente do Río Umia) dentro da programación prevista do Proxecto Ríos. O Río Pequeno percorre a Parroquia cambadesa de Oubiña percorrendo múltiples terras de “albariño”.

Nesta ocasión foi alumnado de 4º ESO o encargado de realizar o control bioquímico e biolóxico do estado do río para determinar a súa saúde ecolóxica.

O profesor de Física e Química guiou ó alumnado no estudio dos diversos parámetros físicos (profundidade, caudal, velocidade da corrente...) e químicos (concentración de nitratos, demanda de osíxeno, pH ...).

O profesorado de Bioloxía foi o encargado de coordinar a recolección e identificación das especies de macroinvertebrados que definiron finalmente que nesta estación anual o estado de saúde do Río Pequeno é ecoloxicamente bo.

PROXECTO NATURÉZATE 2023/24: NATURÉZATE ASOREY PARTICIPA NA LIMPEZA SIMULTÁNEA DE PRAIAS

 

A asociación pola Defensa Ecolóxica de Galiza (ADEGA) acaba de organizar a XII edición da Limpeza Simultánea de Praias para os días 6 e 7 de outubro. O venres 6 de outubro, o profesorado do IES Francisco Asorey participante no proxecto Naturézate para este curso escolar 2023-24, xunto co alumnado do centro propúxose participar nesta nova edición do citado evento por varias razóns. A primeira é porque eliximos a praia de San Tomé en Cambados como lugar de participación e que forma parte do Espazo Natural Ons- O Grove que é o noso centro de actuación. Pero ademais semellábanos de gran interese que o alumnado comprendese en primeira persoa a problemática dos residuos presentes nas praias galegas. Que comprobara a orixe humana deste problema; de como os pequenos plásticos e cabichas de tabaco son realmente unha problemática de importancia e vinculada coa inconsciencia cidadá. Así mesmo a nosa participación tentou resaltar e concienciar como a implicación do voluntariado resulta imprescindible para loitar contra esta problemática e outras problemáticas ecolóxicas.

Esta participación serviunos a todos e todas para aprender e comprobar de primeira man a importancia da nosa implicación para eliminar ou minimizar este tipo de problemáticas.